‘‘‘ตีหิ วิชฺชาหิ สมฺปนฺนํ, กตกิจฺจมนาสวํ;
โคตโม สตฺถวาหคฺโค, เอตทคฺเค ฐเปสฺสติ’ฯ
[82]
‘‘หิตฺวา มานุสกํ โยคํ, เฉตฺวาน ภวพนฺธนํ;
สพฺพาสเว ปริญฺญาย, วิหรามิ อนาสโวฯ
[83]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โมฆราโช เถโร อิมา คาถาโย อภาสิตฺถาติ;
โมฆราชตฺเถรสฺสาปทานํ ปญฺจมํฯ
6. อธิมุตฺตตฺเถรอปทานํ
[84]
‘‘นิพฺพุเต โลกนาถมฺหิ, อตฺถทสฺสีนรุตฺตเม;
อุปฏฺฐหิํ ภิกฺขุสงฺฆํ, วิปฺปสนฺเนน เจตสาฯ
[85]
‘‘นิมนฺเตตฺวา ภิกฺขุสงฺฆํ [สํฆรตนํ (สี. สฺยา.)], อุชุภูตํ สมาหิตํ;
อุจฺฉุนา มณฺฑปํ กตฺวา, โภเชสิํ สงฺฆมุตฺตมํฯ
[86]
‘‘ยํ ยํ โยนุปปชฺชามิ, เทวตฺตํ อถ มานุสํ;
สพฺเพ สตฺเต อภิโภมิ [อติโภมิ (สี. ก.)], ปุญฺญกมฺมสฺสิทํ ผลํฯ
[87]
‘‘อฏฺฐารเส กปฺปสเต, ยํ ทานมททิํ ตทา;
ทุคฺคติํ นาภิชานามิ, อุจฺฉุทานสฺสิทํ ผลํฯ
[88]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อธิมุตฺโต เถโร อิมา คาถาโย อภาสิตฺถาติ;
อธิมุตฺตตฺเถรสฺสาปทานํ ฉฏฺฐํฯ
7. ลสุณทายกตฺเถรอปทานํ
[89]
‘‘หิมวนฺตสฺสาวิทูเร , ตาปโส อาสหํ ตทา;
ลสุณํ อุปชีวามิ, ลสุณํ มยฺหโภชนํฯ
[90]
‘‘ขาริโย ปูรยิตฺวาน, สงฺฆารามมคจฺฉหํ;
หฏฺโฐ หฏฺเฐน จิตฺเตน, สงฺฆสฺส ลสุณํ อทํฯ
[91]
‘‘วิปสฺสิสฺส นรคฺคสฺส, สาสเน นิรตสฺสหํ;
สงฺฆสฺส ลสุณํ ทตฺวา, กปฺปํ สคฺคมฺหิ โมทหํฯ
[92]
‘‘เอกนวุติโต กปฺเป, ลสุณํ ยมทํ ตทา;
ทุคฺคติํ นาภิชานามิ, ลสุณสฺส อิทํ ผลํฯ
[93]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ลสุณทายโก เถโร อิมา คาถาโย อภาสิตฺถาติ;
ลสุณทายกตฺเถรสฺสาปทานํ สตฺตมํฯ
8. อายาคทายกตฺเถรอปทานํ
[94]
‘‘นิพฺพุเต โลกนาถมฺหิ, สิขิมฺหิ วทตํ วเร;
หฏฺโฐ หฏฺเฐน จิตฺเตน, อวนฺทิํ ถูปมุตฺตมํฯ
[95]
‘‘วฑฺฒกีหิ กถาเปตฺวา, มูลํ ทตฺวานหํ ตทา;
หฏฺโฐ หฏฺเฐน จิตฺเตน, อายาคํ การเปสหํฯ
[96]
‘‘อฏฺฐ กปฺปานิ เทเวสุ, อพฺโพกิณฺณํ [อพฺโพจฺฉินฺนํ (สี.)] วสิํ อหํ;
อวเสเสสุ กปฺเปสุ, โวกิณฺณํ สํสริํ อหํฯ
[97]
‘‘กาเย วิสํ น กมติ, สตฺถานิ น จ หนฺติ เม;
อุทเกหํ น มิยฺยามิ, อายาคสฺส อิทํ ผลํฯ
[98]
‘‘ยทิจฺฉามิ อหํ วสฺสํ, มหาเมโฆ ปวสฺสติ;
เทวาปิ เม วสํ เอนฺติ, ปุญฺญกมฺมสฺสิทํ ผลํฯ
[99]
‘‘สตฺตรตนสมฺปนฺโน, ติสกฺขตฺตุํ อโหสหํ;
น มํ เกจาวชานนฺติ, ปุญฺญกมฺมสฺสิทํ ผลํฯ
[100]
‘‘เอกตฺติํเส อิโต กปฺเป, อายาคํ ยมการยิํ;
ทุคฺคติํ นาภิชานามิ, อายาคสฺส อิทํ ผลํฯ
[101]